സ്നേഹ ചുംബനം

രാവിലെ തന്നെ അവൾ തിടുക്കത്തിലാ, " നിങ്ങള് ഇങ്ങനെ പത്രവും വായിച്ചിരുന്നോ ..!!! ഞാൻ ഇന്നലേ പറഞ്ഞതലേ അവൻ പെട്ടി പൊളിക്കുന്നതിന് മുൻപ് അവിടെ എത്തണം എന്ന്.

 ഇല്ലെങ്കിൽ അവൻ ഗൾഫീന്നു കൊണ്ട് വന്നതെല്ലാം നാത്തൂൻ കട്ടിലനടിയിൽ താഴ്ത്തും . അവളെ വിചാരം അവൻ കൊണ്ട് വരുന്നത് അവള്ക്കും മക്കൾക്കും മാത്രമാണെന്നാ .. എന്റെ സഹോദരൻ ആയതിനു ശേഷാ അവളുടെ ഭർത്താവായത് ...ഹല്ല പിന്നെ "

അവൾ അരിശം മുഴുവൻ മോള്ളുടെ മുടി പിന്നി കെട്ടുന്നതിന്റെ ശക്തി കൂട്ടി തീർത്തു " അമ്മേ എനിക്കു മുടി വേദനിക്കുന്നു ..." മോൾ അവളുടെ കൈ തട്ടി മാറ്റി എന്റെ അടുത്തേക്ക് ഓടി വന്നു. ഞാൻ അവളുടെ നെറുകയിൽ ഉമ്മവച്ചു മുടി മാടി കെട്ടികൊടുത്തു. അവൾ എന്നിക്ക് ഒരു ഉമ്മയും തന്നു പുറത്തേക്കോടി .

ആ ഓട്ടത്തിനിടയക്ക് അനിയത്തി റൂമിലേക്ക് കടന്നു വന്നതും. . മകൾ അവളെ കൂട്ടി മുട്ടി വീണു . " നോക്കി കണ്ടും വേണ്ടേ റൂമിലേക്ക് വരാൻ ... ഇപ്പോ തന്നെ അവള് തലയടിച്ചു വീഴില്ലായിരുന്നോ ..? " അവൾ അനിയത്തിക്കു നേരെ ചോദ്യമെറിഞ്ഞു .

കൂടുതൽ അനിഷ്ട സംഭവങ്ങൾ ഉണ്ടാവുന്നതിനു മുന്പ് ഞാൻ അവളെ കൈ കാട്ടി വിളിച്ചു കൊണ്ട് ചോദിച്ചു " മോള് എന്തേ വന്നത് ..?" 

" ഇന്നാണ് പരീക്ഷ ഫീസ് അടക്കേണ്ട അവസാന ദിവസം .." അവൾ മടിച്ചു മടിച്ചു പറഞ്ഞു .

" ആണോ നീ എന്തേ മുന്നേ പറയാഞ്ഞേ ... "

" അത്.. അത്... ചേട്ടന്റെ ബുദ്ധിമുട്ട് കണ്ടപ്പോൾ ..... "

" ചേട്ടന്റെ ബുദ്ധിമുട്ട് മോള് നോക്കേണ്ട ... അതിനു മാത്രം മോള് വലുതായിട്ടില്ല .." ഞാൻ അവളുടെ ചെവി പിടിച്ചു പതുക്കെ നുള്ളി കൊണ്ട് പറഞ്ഞു . എന്നിട്ട് പേഴ്സിൽ നിന്നും അവൾക്കു വേണ്ട തുക എടുത്തു നൽകി .അവളുടെ തലയിൽ സ്നേഹത്തോടെ തട്ട് കൊടുത്തു അവളും തിരിച്ചു തട്ടി നിറഞ്ഞ മനസുമായി പുറത്തേക്ക് പോയി .

" നിങ്ങൾ ഉള്ളത് മുഴുവൻ അനിയത്തിമാർക്ക് വീതിക്കാൻ നിന്നാൽ ഞാനും മോളും പെരുവഴിയിൽ ആവുമേ!!! " അവൾ പൊട്ടു തിരയുന്നതിനിടയിൽ പറഞ്ഞു . 

ഞാൻ ഒരു പൊട്ടെടുത്തു അവളുടെ നെറ്റിയിൽ വെച്ച് കൊണ്ട് അവളെ ചേർത്ത് നിർത്തികൊണ്ട് പറഞ്ഞു " നിന്റെ ചേട്ടൻ മാത്രമല്ല ...ഞാനും ഒരു ജേഷ്ടൻ ആയതിനു ശേഷമാ ഭർത്താവായത്. നിനക്ക് അവകാശപ്പെട്ടത് പോലെ അല്ലേ അവൾക്കും .. പിന്നെ അങ്ങിനെ പെരുവഴിയിൽ നീയും മോളും ഇറങ്ങേണ്ടി വന്നാൽ ഈ കൈകോർത്തു ഞാൻ ഉണ്ടാവും അന്നും നിന്ന്റെ കൂടെ ... ഞാൻ ഇന്ന് വരെ നേടിയതിൽ ഒരിക്കലും നഷ്ട്ടപ്പെടാൻ ആഗ്രഹിക്കാത്ത സ്വത്ത് എന്താണെന്ന് നിനക്കറിയാമോ ..?

" ഇല്ല ..:" ആകാംക്ഷയോടെ അവൾ പറഞ്ഞു .

" അത് നീയാണ് ... ഞാൻ ഒരിക്കലും നഷ്ട്ടപ്പെടാൻ ആഗ്രഹിക്കാത്ത സ്വത്ത് " ഞാൻ അവളെ നെഞ്ചോട് ചേർത്തു. അവൾ അല്പ്പം നേരം ആ നിൽപ്പ് ആസ്വദിച്ചതിനു ശേഷം പതുക്കെ വിമുഖതയോടെ പറഞ്ഞു " വിട്ടേ ... ഞാൻ ഡ്രസ്സ് മാറട്ടെ .. "

" എന്തേ....? അപ്പൊ നീ പോവുന്നില്ലേ ..?"

" ഇല്ല ... ഇതിലും വല്യ സ്വത്തൊന്നും എനിക്ക് അവിടെ നിന്നും ലഭിക്കാനില്ല . അവിടെ നിന്ന് എന്നല്ല എവിടെ നിന്നും ലഭിക്കാനില്ല " അവൾ മതിവരാത്ത പോൽ വീണ്ടും എന്റെ മാറിലേക്ക് ചാഞ്ഞു കൊണ്ട് പറഞ്ഞു .

" ഉം.. .. അതാ എനിക്കും പറയാൻ ഉള്ളത് സ്നേഹത്തെക്കാൾ വലിയ സ്വത്തില്ല .." ഞാൻ ചിരിച്ചു കൊണ്ട് അവളുടെ നെറുകയിൽ ഒരു സ്നേഹചുംബനം നൽകികൊണ്ട് പറഞ്ഞു .

മനോജ് കുമാർ കാപ്പാട്