യക്ഷി(മല്ലു).....കവിത

യക്ഷി(മല്ലു).....കവിത

പാതിരാവിലെങ്ങോ
പതിഞ്ഞൊരു പദസ്വനത്തിൻ
മണം പിടിച്ചോരയിടും 
കറുത്ത ശ്വനനും ,

ഇരുളിലിഴഞ്ഞു നീങ്ങിടും
നിഴലിനെ കാണ്‍കെ;
തലങ്ങും വിലങ്ങും
കരഞ്ഞോടും കരിമ്പൂച്ചയും,

അരുതാത്ത ശബ്ദത്തിനല-
യടികേട്ടിടും ഭയവിഹ്വലതയിൽ
പേ പറഞ്ഞു പറന്നുയരും
നരച്ചീറിൻ കരിങ്കൂട്ടങ്ങളും,

കെട്ടഴിഞ്ഞോടും ഭ്രാന്തിയെ പോൽ
പതം പറഞ്ഞു വീശിയെത്തി-
നാലുദിക്കോടി വീഴും കാറ്റും,

പാതാളം തുറന്നൊഴുകിയെത്തും
വെളുത്തു മിന്നും പുകപടലങ്ങളും
കാർമേഘ മറവിൽ മയങ്ങി
നിൽക്കും പൂർണ്ണ ചന്ദ്രനും ,

ആലുമത്തിയും പാലമരവും
കൂടെ പൊട്ടിപ്പൊളിഞ്ഞൊരു-
മാറാല മൂടിടും പഴയൊരു നാലുകെട്ടും,

നിലമുട്ടെയിഴയുന്നയിടതൂർന്നു
കറുത്തിരുണ്ട കാർക്കൂന്തലും ,
ഉടൽ ഭംഗിയാകെ തെളിഞ്ഞു കാണും,
നിലത്തിഴയും ശുഭ്ര വസ്ത്രധാരി-
യേയും,കണ്ടുവെങ്കിൽ !

കൂടെ, പശ്ചാത്തല സംഗീതത്തിനക-
മ്പടിയോടെ,തേങ്ങലു മട്ടഹാസങ്ങളും
ചേർന്നിമ്പമാർന്ന ഗാനവും കേട്ടുവെങ്കിൽ,,,,,,,,,

അരുതാരും ഭയന്നീടരുതു
ഇതൊരു നാടാൻ പ്രേതമാണ്‌
നമ്മുടെ മലയാളി യക്ഷിയാണ് !

ജൂട്സണ്‍ ................................ജെ.സണ്‍